Олон улсын ахмадын өдрийг тохиолдуулан Улсын Их Хурал, Тамгын газраас өнөөдөр (2026.09.25) ахмадуудаа хүлээн авч, хүндэтгэл үзүүллээ.
Монгол Улсын Их Хурлын дарга С.Бямбацогт уулзалт арга хэмжээг нээж хэлсэн үгийнхээ эхэнд, Монгол төрийн эрх барих хууль тогтоох, ард түмнийг төлөөлөх дээд байгууллагын парламентад Ардын Их Хурлын депутат, Улсын Их Хурлын гишүүнээр сонгогдон ажиллаж байсан төр, нийгмийн зүтгэлтнүүд, Тамгын газарт ажиллаж байсан нийт ахмадууд, азай буурлуудадаа Олон улсын ахмадын баярын мэндийг дэвшүүлэв.
Ахмад настнаа хүндэтгэх, тэднийхээ хөдөлмөр, нийгэмд оруулсан хувь нэмэр, амьдралын арвин туршлагаас суралцах нь зөвхөн нэгэн өдрийн тэмдэглэлт үйл явдал бус, хүн ёсны жудаг, монгол үндэстний уламжлалт ухаан, амьдралын гүн философи гэдгийг Улсын Их Хурлын дарга энэ үеэр онцлон тэмдэглэв.
Мөн Монгол Улсад байнгын ажиллагаатай парламент Улсын Бага Хурал байгуулагдсаны ойг хэдхэн хоногийн өмнө тэмдэглэн өнгөрүүлснийг Улсын Их Хурлын дарга дурдаад, нам, бүлэг, фракц, жигүүрийн явцуу эрх ашиг, хувийн сонирхолд хөтлөгдөхгүйгээр улс орон, иргэдийнхээ нийтлэг эрх ашгийн төлөө мэдлэг чадвар, сэтгэл зүтгэлээ зориулж, дайчлан ажиллаж, зөвшилцөж, зөвийг олж ажилладаг парламент ёсны сайн уламжлалыг Улсын Бага Хурлаас эхлэн өдгөө найм дахь удаагаа Монгол Улсын Их Хурал төгөлдөржүүлэн залгамжилж явааг дуулгалаа.
Туршлагатай парламентчид, Тамгын газрын ахмад буурлууд ард түмнийхээ итгэлийг дааж, нийгмийн олон талын дуу хоолойг сонсон, хүний эрх, эрх чөлөөг эрхэмлэн, төрийн бодлого шийдвэрээ гаргаж ирсэн үнэ цэнтэй уламжлалыг үлдээсэнд чин сэтгэлээсээ талархаж явдгаа Улсын Их Хурлын дарга онцолсон.
Иргэдийнхээ санаа бодол, амьдралд тулгамдсан асуудлыг сонсож, түүнд тулгуурлаж шийдвэр гаргадаг тогтолцоог бүрдүүлэхэд чиглэж ажиллаж буйгаа Улсын Их Хурлын дарга С.Бямбацогт тодотгоод, энэ хүрээнд өнгөрсөн хаврын чуулганаас эхлээд “Нээлттэй парламент” шинэчлэлийн хөтөлбөрийг дэвшүүлсэн талаараа танилцуулав. Хөтөлбөрийн хүрээнд Улсын Их Хурлын үйл ажиллагааг зөвхөн нээлттэй мэдээлдэг бус иргэддээ оролцуулдаг, сонсдог, тэдний хяналт тавих боломжийг олгоход чиглэж, төрийн үйлчилгээний “И-Монголиа” системд “УИХ таныг сонсож байна” цэсийг нэвтрүүлсний зэрэгцээ “Нээлттэй парламент” танхимыг нээж, Улсын Их Хурлын гишүүд, иргэд хоорондоо чөлөөтэй уулзаж, санал солилцох боломжийг нэмэгдүүлсэн зэргээр хийж, хэрэгжүүлж буй ажлынхаа талаар танилцуулсан.
Түүнчлэн иргэдийнхээ санал хүсэлтэд тулгуурлан зээлийн хар жагсаалт, орон сууцны захиалгын луйвар, цахим гэмт хэрэг зэрэг тулгамдсан асуудлыг шийдвэрлэхээр эрх зүйн орчныг сайжруулахаар гишүүдээс өргөн барьсан хуулийн төслүүдийг хэлэлцэж буй талаараа дуулгав.
Ахмад настнаа хүндэтгэн хүлээн авах арга хэмжээнд Монгол Улсын Их Хурлын Ерөнхий нарийн бичгийн дарга Л.Өлзийсайхан, Улсын Их Хурлын даргын ахлах зөвлөх Ш.Раднаасэд, Улсын Их Хурлын Тамгын газрын дэргэдэх Ахмадын хорооны дарга Ц.Шаравдорж нар болон Ардын Их Хурлын депутат, Улсын Бага Хурал болон Улсын Их Хурлын гишүүн мөн Тамгын газарт ажиллаж байсан нийт 120 гаруй ахмад оролцов.
Хүндэтгэл үзүүлэх үйл ажиллагаанд хуран цугласан Улсын Их Хурал, Тамгын газрын ахмад настнуудыг төлөөлж, Монгол Улсын Их Хурлын гишүүн асан, УИХ-ын Тамгын газрын дэргэдэх Ахмадын хорооны дарга Ц.Шаравдорж, Улсын Их Хурлын гишүүн асан Ч.Авдай нар үг хэлж, санал бодлоо илэрхийллээ хэмээн Улсын Их Хурлын Нээлттэй парламентын газраас мэдээлэв.
