Энэ сард тусгай үүргийн чиглэлийн 12 нислэг үйлдэх байсныг 13 болгожээ. Ингэснээр нийт 3380 орчим иргэн эх орондоо ирэх юм.

Энэ талаар ГХЯ-ны Консулын газрын дарга Л.Мөнхтүшиг тайлбар өглөө. Тэрбээр “Энэ сард Хонг-Конгийн чиглэл рүү хоёр нислэг үйлдэнэ. Өнөөдөр нэг нислэг нь ирнэ. Нислэгээр АНУ, Австралид байгаа иргэдээ түлхүү авчирч байна.

Өнөөдөр 261 иргэн ирнэ. Үүнд Сан-Францискод Ерөнхий консулын газар бүртгүүлсэн 130 гаруй иргэн, вашингтон дахь Элчин сайдын яаманд бүртгүүлсэн 40, Австралиас буцаж байгаа 50 гаруй иргэн багтсан.

Энэ арын 17-нд Хонг-Конг руу дахин транзит нислэг үйлдэнэ. Канад, Америк, Австрали гэсэн чиглэлтэй. Мөн БНСУ-ын чиглэлд нислэгийн давтамжийг аль болох нэмэгдүүлнэ.

Түүнчлэн БНХАУ-д байгаа гэр бүлтэйгээ нийлэх, буцах хүсэлт иргэд удаа дараа ирүүлж байна. Эдгээр иргэдийн төлөөлөлтэй ГХЯ өдөр бүр уулзаж нөхцөл байдлыг тайлбарлаж байгаа. Бид Хятадын талтай уг асуудлыг хүмүүнлэгийн чиглэлээр шийдвэрлэх хүсэлт гаргасан. Ойрын хугацаанд энэ асуудлыг шат дараатай шийдвэрлэнэ гэсэн хүлээлттэй байна.

Сарын сүүлээр тусгаарлах байрны нөөц боломжтой улядуулан Казахстан улс руу дахин нислэг үйлдэх боломжтой эсэхийг судалж байна. Энэ асуудал тодорхой болсны дараа нэмэлт мэдээлэл өгнө.

Япон улс руу явах хүсэлтэй 240 гаруй иргэн байна. Япон улсын зүгээс байнга оршин суух зөвшөөрөл өгсөн ч виз олгох зөвшөөрлийг Элчин сайдын яаманд өгөөгүй байна. Цар тахалтай холбогдуулан тус улсаас авч хэрэгжүүлж байгаа арга хэмжээтэй уялдуулж зохион байгуулах талаар Японы Элчин сайдтай үргэлжлүүлэн ярих болно” гэлээ.

Б.Лхам