С.Чулуун Соёлын сайд болонгуутаа нийгэмд таалагдах гэж Улсын циркийг, кино үйлдвэрийг улсад буцаан авна хэмээн том дуугарсан. Энэ нь ч түүнд оноо авчирч,  урлагийнхан алгаа ташин хүлээн авсан билээ. Сайн мэдээ дуулсан урлагийнхан тэр дундаа циркчид сайдынхаа үүдийг сахиж, хэзээ, хэрхэн буцааж авах талаар ярилцахыг хүссэн ч эрхэм сайд тойрч зугтан халгаагаагүй. Эцэстээ “Юун цирк” хэмээн булзах болж, шинэхэн дээрээ соохолзоно гэгчээр дөнгөж сайд болж байсан үеэсээ тэс өөр хүн болон хувирснийг энэ салбарынхан ярьж байна.

“АСА” цирк, Монгол Улсын Консерваторийн их сургууль, БШУЯ-ны Консерваторийн захиргаа нийлж гурвалсан гэрээ байгуулан, сарын 15 сая төгрөгийн түрээс төлж Улсын циркэд бэлтгэл, сургуулилтаа хийхээр анх тохиролцсон байдаг.

Өдөрт найман цагаар бэлтгэл хийхээр гэрээнд заасан ч нэг ч өдөр үүнийгээ биелүүлээгүйн дээр  улсаас түрээсийн мөнгөө бүтнээр авч иржээ. “АСА”-гийнхны шунал даанч хэтийджээ. 

Циркэд өдгөө иж бүрэн засвар хийж байгаа. Аса аварга энэ талаар “Санаа зоволтгүй. Циркийг цирк хэвээр нь үлдээнэ” хэмээн жиргэсэн ч үүнд нь итгэсэн хүн ховор. 2021 оны зургаадугаар сард засварын ажил дуусна гэж байгаа ч үнэндээ таазнаасаа олон өнгийн гэрэл унжуулсан тансаг шоуны газар  гэж эндүүрмээр цирк гэж байх уу.

Өнөөдөр байдал ийм байгааг Монгол Улсын Консерваторийн Бүжиг, циркийн мэргэжлийн сургуулийн Циркийн тэнхмийн багш, найруулагч, МУСТА Ю.Гэрэлбаатар харамсан өгүүлжээ. Тэрбээр циркийн газрыг худалдчихсан гэх  ноцтой баримтыг энэ үеэр дэлгэлээ.

Циркийн газар нь 50 сая ам.долларын үнэлгээтэй ч “АСА”-гийнхан 1,5 тэрбум төгрөгөөр худалдчихжээ. 50 сая ам.доллар гэдэг барагцаалбал, 140 гаруй тэрбум төгрөг юм. Хотын төвийн А зэрэглэлийн циркийн газрыг бүрмөсөн худалдсан уу, барьцаанд тавьсан уу, эсвэл дам үг үү уу энэ бүгдийг холбогдох албаныхан ялангуяа ноён Ерөнхий сайд та нягталж шалгуулах хэрэгтэй болжээ.

Аль ашигтай газар бүрийг нэг мэдэхэд л худалдчихсан байдаг болохоор үгүйсгэх аргагүй юм. 

Циркээ хашаалчихаад дураараа дургидаг “АСА”-гийнхан хэлсэндээ хүрч циркийг цирк хэвээр нь үлдээх нь үү, дээд зэрэглэлийн тансаг шоуны газар болон хувиргах уу гэдэг нь цаг хугацааны асуудал болж үлдлээ.

У.Тэргэл